सांत्वन

अंतर होते तसे परंतु

     असेही आता पडावयाचे

माहित होते मनामनाला

     अखेर हेही घडावयाचे .

खंत कशाला श्रावणतेचा

     खजिना फुटला गगनावरती

इंद्रजाल हे काय कुडाच्या

     या भिंतीवर चढावयाचे ?

नियती देते दान असे कि

     खिशांमध्ये जे मावत नाही

खिशे असे कंगाल मिळाले

     त्यासाठी का कढावयाचे ?

अपुल्या भिंती खिसेही अपूले

    अभेद्य त्यांची हुकुमत असते

म्हणून का तिमिराचे घुंगट

     या घटकेवर विनावयाचे ?

: सांत्वन

: वादळवेल

: कुसुमाग्रज